Wagas gidala na sa Sandigan

CEBU, Philippines - Gihatod na sa Sandiganbayan sa Manila si kanhi Mayor Gilbert Wagas sa Compostela kagahapon. Gidakop kini sa National Bureau of Investigation (NBI-7) sa usa ka coffee shop sa SM City Cebu niadtong Miyerkules sa hapon tungod sa kasong malversation of public funds.

Si NBI-7 director Medardo Delimos nagkanayon nga mga alas 11 kagahapon sa buntag gi-eskortan sa mga ahente sa NBI pinangulohan ni Arnel Pura si Wagas sakay sa Philippine Airlines aron ipresentar sa Sandiganbayan 4th Division.

Si Wagas gidakop sa mga ahente sa NBI human malutsi og bench warrant nga giluwatan sa Sandiganbayan human makonbikto sa naasoy’ng kaso niadtong Oktubre 28, 2001.

Gipasabot ni Delimos nga balido ang bench warrant batok ni Wagas gumikan kay gipa-verify niya kini didto sa Sandiganbayan-Manila human milusot Nobiyembre 4 ug igo lang silang gitahasan pag-serve niini.

Napugos ang mga ahente sa NBI pagposas kang Wagas nga gidala paingon sa buhatan sa NBI-7 human kini misuway og pagsukol sa mga ahente nga mi-serve sa warrant ug nagmagahi unta kini pag-uban kanila.

Matud ni Delimos magpaabot pa sila sa hukom sa Sandiganbayan kun unsay sunod mahitabo human sa pagpresentar kang Wagas didto sa Sandiganbayan kun ibalik ba kini dinhi sa Sugbo o adto kasamtangang i-kostudiya samtang wala pa tugoti makagawas.

Hinuon ang abogado ni Wagas nga si Atty. George Bragat miinsister nga bahaw na ang maong bench warrant tungod kay kaniadto pa kining Hulyo 2, 2003 ug gibalik lang kini karong bag-o.

Hinoon gibutyag ni Bragat nga nagsabot pa karon sila si Atty. Ernesto Rama alang sa legal nga lakang nga ilang himuon aron kabuhian si Wagas.

Si Compostela Mayor Ritchie Wagas, manghod ni Gilbert, una nang mikuwestyon sa bench warrant nga gihulagway niyang pamolitika tungod sa plano sa iyang maguwang nga magpapili pagka-kongresista sa ikalimang distrito sa lalawigan batok sa mga Durano. – BANAT NEWS