CEBU, Philippines - Gihiklin una sa konseho sa dakbayan sa Talisay ang gidusong resolusyon kagahapon ni Konsehal Dennis Basillote atol sa ilang regular nga sesyon bahin sa palitonong lote diha sa barangay Biasong nga himoong usa sa relocation site tungod kay ang maong lote walay titulo.
Si Basillote kinsa tsirman sa committee on urban poor and housing development miduso sa resolusyon numero 2009-40-2 nga nagtugot kang Mayor Socrates Fernandez sa pagpalit sa lote nga gipanag-iya sa pamilyang Sejeismundo diha sa Biasong.
Ang lote numero 2436 nga dunay gilapdon nga 5,088 metro kwadrado nga gitanyag og tag P1,200 matag metro kuwadrado maoy giplanohan nga tukoran og mga low cost housing project alang sa mga kabus nga Talisaynon ug sa mga nawagtangan og mga balay tungod sa kalamidad.
Apan nasuta sa konseho sa siyudad nga ang nahisgutang lote walay titulo hinungdan nga gipadaplin lang una kini sa mga konsehal.
Si Konsehal Edward Alesna, chairman sa committee on laws sa pakighinabi sa Banat News kagahapon nagkanayon nga tax declaration lang ang gigunitan sa miangkong tag-iya sa lote ug dili igong rason ug kamatuoran nga siya nay tinuod nga tag-iya sa maong luna.
Matud ni Alesna nga ang paliton nga lote sa siyudad kadtong limpiyo na og titulo kay kung mahitabong bayran sa siyudad ang usa ka lote nga dili titulado piho nga ikakiha ang kagamhanan sa dakbayan ngadto sa Ombudsman.
Hinuon gisugyot nila ni Alesna kang Basillote nga patitulohan una sa tag-iya ang iyang lote una kini bayaran sa kagamhanan sa dakbayan. - Brenda D. Batuto (BANAT NEWS)