Ginang gisungag sa motor namatay

CEBU, Philippines - Patay ang usa ka 57-anyos nga ginang human madasmagi sa batabata sa pari nga nag-joy-ride sa motor sa naulahi diha sa sitio Gawahon barangay Poblacion-2 lungsod sa Malabuyoc niadtong Domingo sa alas 5:30 sa hapon.

Ang patay nang nadangat sa tambalanan mao si Emecasia Mendez, 57, biyuda ug molupyo ra sa nahisgutang lugar samtang ang drayber sa motorsiklo mao si Rizaldy Villafuerte, 30, taga Poblacion, Ronda ug bata bata sa kura paroko sa Madredijos lungsod sa Alegria.

Matod ni SPO3 Ariel Mascardo sa Malabuyoc Police dihang nahinabi sa Banat News, si Villafuerte wala mananghid sa pari nga tag-iya sa motorsiklo ug gigamit kini pagsuroy sa barangay Sto. Niño ug nakig-inom sa mga barkada.

Human niini giingong giangkas pa niini ang usa sa mga barkada pauli apan nadasmagan niini ang biktima daplin sa karsada.

Daling gihatud sa MJ Cuenco Memorial Hospital si Mendez apan nabugtoan kini sa kinabuhi, ang suspek gidakop sa mirespondeng polis. - BANAT NEWS