CEBU, Philippines - Napulo ka mga dagkong balay apan sagad ginama sa light materials ang naugdaw sa nahitabong sunog sa sitio Mangahan sa barangay Punta Prinsesa niadtong milabay'ng gabii. Gibana-bana sa kabumberohan ang danyos moabot sa P4.8 milyones apan walay na-report nga nasamdan sa maong hitabo.
Si FO3 Antonio Gonzales, imbestigador sa Cebu City Bureau of Fire Protection mitug-an nga nagsugod ang sunog sa panimalay nga gipanag-iya ni Jovencio Cabarse.
Gikatahong wala diha sa iyang balay si Cabarse sa pagkahitabo. Apan usa sa gisusi karon sa kabomberuhan ang report sa usa ka sibyaanan nga hungaw nga liquefied petroleum gas (LPG) maoy hinungdan sa maong sunog.
Ang kalayo gideklarar nga under control sulod sa 45 minutos apan giisa kini ngadto sa third alarm gumikan sa peligrong motapon pa kini sa kabalayan.
Usa sa gihulagway sa mga barangay officials nga problema mao ang kahagip-ot sa dalan ug naglisod ang mga dagkong trak sa bombero sa pagsulod maayo nalang nga dunay usa ka fire hyrdrant ang nagamit diha duol sa gihitaboan.
Lakip sa gitudlong problema sa mga bombero ang kadaghan sa mga tawo diha sa dalan gawas pa sa mga biktima ug namakwit nga mga residente sanglit hasta mga nanguryoso nagpunsisok usab.
Ang mga biktima temporaryong gipasilong diha sa barangay social hall ug gihatagan na og hinabang sa dakbayan. – BANAT NEWS