Mega shabu laboratory hearing karon

CEBU, Philippines - Ang duha ka adlaw nga marathon hearing sa kaso nga may labot sa mega shabu laboratory sa dakbayan sa Mandaue ipahigayon karon ug ugma sa Regional Trial Court, Branch 28 sa maong dakbayan.

Mao kini gibutyag ni Undersecretary Paul Clarence Oaminal sa Dangerous Drugs Board sa Banat News kagahapon kinsa nagkanayon nga ang maong husay tambongan sa mga magbabalaod sa nasud. Matud pa ni   Usec. Oaminal nga ang nahisgutang laboratoryo nahimutang sa sulod sa R Us Compound nga gironda sa mga sakop sa Philippine Drug Enforcement Agency (PDEA) niadtong Septembre 4, 2004.

May 11 ka tawo ang nadakpan sa maong pagronda diin siyam niini pulos mga langyaw.

Ang nasakmit sa mga otoridad sa PDEA sa maong pagronda mao ang 1.1 ka tonilada   nga methamphetamine hydrochloride, nga giingong maoy labing dako nga nasakmit nga illegal nga drugas sa tibuok Asia ug bisan hangtod karon wala na hitupngi o hilabwi ba hinuon ang maong malampusong pagpangronda.

Miingon si Usec. Oaminal nga human sa usa ka tuig kapin, si Calvin Tan, kinsa maoy suspetsadong financier sa maong laboratoryo, gipadala nganhi sa nasud gikan sa Hongkong.

Duha ka mga tag-iya sa bodega sa dakbayan sa Mandaue nga maoy gihimong laboratoryo nalambigit usab sa maong kaso nga nakapahimong 14 ang tanang sinumbong ning maong kaso.

Kining maong kaso gi- monitor usab sa Task Force Euripides sa Office of the Vice Chairman sa DDB ug gumikan niini gilusad ni Usec. Oaminal ang hugot nga pagpaniid niini sa pagsiguro nga hingpit kining mahusay

Ugma Biyernes, ang mga miyembro sa House Committee on Dangerous Drugs nga pangunahan ni Kongresista Roque Ablan, Jr. ug Antonio Cuenco motambong sa maong hearing ug maniid sa mga pamaagi sa paghusay sa korte niini. Ang mosunod nga mga hearing ipahigayon usab unya sa Nobyembre 5,6, 19 ug 20, Decembre 3 ug 4 ning tuiga ug sa Enero 14, 15, 28, ug 29, 2010. – BANAT NEWS