CEBU, Philippines - Nabuslot ang ilok sa usa ka tawo human kini dunggaba sa iyang kauban sa trabaho didto sa sitio Pilit, barangay Cabancalan, dakbayan sa Mandaue sa miaging gabii.
Ang biktima mao si Eric Lamoste, hingkod, nga lumad nga taga Bohol, ug trabahante sa Arreglos Fashion Accessories nga nahimutang sa sitio Pilit.
Samtang ang suspetsado mao usab si Boyet Villavicencio, 33, ulitawo, nga lumad usab nga taga Poblacion, sa lungsod sa San Fernando.
Si PO1 Sandy Baclay ug PO2 Ariel Perez sa Presinto 4 sa Casuntingan Police Station nga nahinabi sa Banat News miingon nga nagkuyog ang suspetsado ug biktima sa pag-inom og ilimnong makahubog sa usa ka tindahan sa maong dapit.
Matud pa ni PO2 Perez nga dihang nangalasbag na miulbo ang panaglalis sa duha ug dihang nakabsan na sa katarungan ang suspetsado milanit kini sa iyang 7 pulgadas nga kutsilyo ug gihansak dayon sa ilok sa biktima .
Ang biktima dali nga gidala sa Mandaue City District Hospital samtang ang suspetsado nadakpan usab dayon sa kapolisan ug nagtingkagol na karon sa bilanggoan. (BANAT NEWS)