CEBU, Philippines - Ang kagamhanan sa dakbayan sa Talisay naningkamot nga mosalbar niadtong mga kawani nga mawad-an og trabaho pinaagi sa paghatag kanila og trabaho diha sa City Hall.
Si Konsehal Edward Alesna, chairman sa committee on laws sa pakighinabi niini sa Banat News kagahapon nagkanayon nga tungod sa Global Financial Crisis (GFC) mikabat sa 300 ka mga Talisaynon ang nataktak sa ilang trabaho gikan sa mga kompaniya nga ilang gitrabahoan niining tuiga.
Tungod niini ang resolusyon numero 2009-33-5 gipangamahanan ni Alesna giaprobahan kagahapon sa konseho nga nag-lig-on sa kasigurohan sa mga kawaning wala nay trabaho gikan sa pribadong mga kompaniya, makatrabaho diha sa City Hall.
Kaabag sa local nga kagamhanan sa Talisay sa paghatag og hinabang sa mga natangtang sa ilang trabaho, mao ang Department of Labor and Employment (DOLE) nga nagtanyag og emergency employment program (EEP) ngadto kanila.
Ning maong sistema, 80 porsento sa suholan sa mga makatrabaho ubos sa EEP, abagahon sa DOLE, samtang ang 20 porsento sa maong suholan iya na sa kagamhanan sa Talisay.
Sa pagkakaron 60 sa 300 ka mga kawani nga nawagtangan og trabaho maoy kahatagan og trabaho diha sa City Hall. - Brenda D. Batuto (BANAT NEWS)