'Desperado" naghikog namatay

CEBU, Philippines - Patay nang napalgan sa iyang mga ginikanan ang usa ka 19-anyos nga lalaki kinsa giingong naghikog gamit ang panapton nga gihigot sa iyang li-og ug ang pikas tumoy gikutay ngadto sa kisame, niadtong Sabado sa hapon sa barangay Maghaway, dakbayan sa Talisay.

Ang napalgang patay nga nagbitay diha sulod sa ilang balay mao si Arnel Tampos kinsa giingong desperado na tungod sa ilang kalisod ug buot unta kining makahuman sa iyang pagtuon sa kolehiyo.

Si Kapitan Edwin Cabatas sa pakighinabi niini sa Banat News kagahapon mibutyag nga base sa ilang nakuhang report nga si Tampos nagmahay tungod sa ilang kalisod sa panginabuhi diin ubay-ubay pod sila ka mga managsuon.

Ang panginabuhian sa iyang mga ginikanan mao ang panguma ug pagpanahi.

Matud ni Cabatas nga dihang migradwar na kini sa high school mga upat ka tuig na ang milabay nangandoy kini nga makapadayon og tungha sa kolehiyo.

Si Tampos ang nanarbaho sa usa sa mga dakong tindahan sa siyudad apan pila lang kini ka buwan tungod kay nahuman na ang kontrata niini ug na-discourage usab kini tungod kay dihang nanarbaho siya sa maong tindahan gikawat ang iyang cellular phone.

Si Cabatas midugang nga ang inahan ni Tampos dunay nakuhang suicide note apan gigisi niini ug wala na ipakita ngadto sa mga polis nga miresponde sa hitabo. – BANAT NEWS