Amo sa mga snatcher gipanid-an

CEBU, Philippines - Giimbistigar karon sa kapolisan sa dakbayan sa Sugbu ang reklamo ni Kapitan Pancho Ramirez sa barangay Sto. Niño nga matud pa adunay usa ka   tawo sa ilang barangay nga nagbuhi og mga menor de edad nga maoy responsabli sa snatching kon panglabni ug uban pang krimen sa dalan Colon ning dakbayan sa Sugbu.

Si Sr. Supt. Patrocinio Comendador, director sa kapolisan sa dakbayan sa Sugbu mibutyag sa Banat News nga human sa maong taho gihulma dayon niya ang usa ka Task Force Colon (TFC) nga maoy gitahasan sa pagbantay sa dalan Colon.

Matud pa ni Comendador nga iyang gitugyan sa TFC ang tanang paagi aron dakpon kining tawhana ug mahunong usab ang dautang patigayon niini nga naghatag og pruhisyo sa katilingban.

Nasayran ni Comendador nga kining tawhana maoy tigdawat sa mga kuwarta ug mga butang nga binugsik sa 5 ngadto sa 6 mga menor de edad nga iyang iladlad sa downtown area sa dakbayan matag adlaw.

Unya inigkahalin sa mga butang nga binugsik nga ipamaligya ning tawhana, piskan lang og ginagmay nga komisyon ang mga batan-on nga naglabni niini.

Puwerting lipaya ni Comendador kay pipila ka takna human niya iladlad usab ang TFC sa Colon sa miaging adlaw nakasikop dayon kini og usa ka snatcher diha sa gawas sa Colonade Mall.

Ang suspetsado giila nga si Raymond Merillos, 18, taga dalan Colon samtang ang gibiktima niini mao si Purita Solomon, 70, nga taga dakbayan sa Lapulapu.

Gawas pa niini, midugang si Comendador nga gipakatap usab nila ang ubang mga polis diha sa barangay Tejero ug MJ. Cuenco tungod kay adunay mga taho anaa usab diha ang tang-an kaayong mga tulisan sa sakyanan nga mamiktima og mga pasahero sa mga public utility jeepney (PUJ). – BANAT NEWS