Notadong 'tulisan' gipatay

CEBU, Philippines - Patay ang usa ka 22-anyos nga lalaki nga gipasanginlang notadong tulisan human kini pusila sa wala mailhing lalaki niadtong Sabado sa buntag diha sa 6th street, sa Mansueto Village, barangay Bulacao, dakbayan sa Talisay.

Ang biktima mao si Oliver Jimenez, residente sa barangay Bulacao, Talisay, nakaangkon og duha ka samad pinusilan sa tiyan, daling gidala sa iyang igsuon nga si Clifford ug sa ubang mga estambay ngadto sa Talisay City District Hospital apan tungod sa kahimtang niini gibalhin ngadto sa Vicente Sotto Memorial Medical Center.

Apan mga 1:10 sa hapon sa samang adlaw nakabsan sa kinabuhi si Jimenez.

Duha ka wala mailhing mga lalaking luwan sa usa ka motorsiklo nga pulos nagsuot og bonnet ang miabot ug miduol sa biktima kinsa niadtong tungura nalingaw sa pagtan-aw sa duwang volleyball.

Base sa imbestigasyon nila ni PO3 Mikie Espina ug PO2 Stephen Sefuesca sa Talisay City Police Station usa sa mga gikatahapan ang mikanaog ug walay daghang pangutana midiretso og pusil sa biktima ug yano usab nga misakay og balik sa motorsiklo ug nangikyas palayo.

Daling gitabang sa iyang igsuon ug mga estambay si Jimenez pagdala sa tambalanan apan namatay gyud kini.

Si Espina sa pakighinabi niini sa Banat News kagahapon mibutyag nga si Jimenez usa sa nalakip sa listahan sa Talisay City Police Station nga usa sa mga tulisan sa siyudad.

Dugang pa niya niadtong milabay'ng tuig nasikop niya kini uban sa laing duha ka mga kaubang tulisan human manulis sa usa ka babayeng pasahero sa jeepney.

Gikatahong human himulbuli sa iyang mga butang gihagbong pa sa maong mga tulisan ang pasaherong babaye.

Matud pa ni Espina napasakaan nila og kaso si Jimenez ug ang mga kauban niini kalabot sa maong kaso apan kini nabasura tungod kay ang biktima nahadlok ug wala na motungha sa hearing.

Kahinumduman nga dili palang dugay, miulbo ang kasuko sa mga taga Talisay human gitulis ug gipatay sa upat ka mga batan-on diha sa barangay Cansojong si Padre Jovencio “Butoy” Rabusa nga nadestino sa Naga samtang kini mibisita sa balay sa igsuon.

Hinuon nasikop dayon ang tanang mga suspek ug napasakaan og kasong robbery with homicide ug nabawi ang kabtangan sa maong pari.

Ang mga gipasanginlang tulisan nga nadakpan giilang sila si Roselo Ravanes, Jonas Turawan alyas Pingloy ug Gerald Tradio ug ang kinse anyos nga ilang kauban. -  BANAT NEWS