CEBU, Philippines – Gisaway ni Kongresista Nerissa Soon-Ruiz si Mayor Jonas Cortes tungod sa gihimong manipesto nga gipirmahan sa 24 ka mga barangay kapitan nga nagpadayag sa ilang sentimiyentong nagtinguhang mahimong Lone Congressional District and dakbayan sa Mandaue.
Ang maong manipesto sa mga kapitan ipadala ngadto kang Presidente Gloria Macapagal Arroyo ug ingon man ngadto sa ubos Balay Balauranan.
Sa 27 ka barangay sa dakbayan tulo lang ang wala nakapirma sa maong manipesto.
Ang maong manipesto nagkanayon nga nahingangha silang mga barangay kapitan kun nganong nahimong Lone District ang dakbayan sa Lapulapu nga bag-o pa man kini nahimong highly urbanized city samtang ang Mandaue dugay nang panahon nga nabutang sa maong grado.
Si Cortes nga nahinabi sa Banat News miingon nga dako ang naalkanse sa mga Mandauehanon sanglit nahikawan kini sa minilyon nga salaping igahin sa usa ka kongresista sa matag tuig.
Samtang si Soon-Ruiz sa iyang tubag nga nahinabi sa DyKC mipasabot nga bisan asa pa ipadala ang manipesto paingon lamang gihapon ngadto kaniya sanglit siya man ang kongresista sa ikaunom nga distrito.
Nunot niini iyang giawhag ang kapitan nga namirma sa pagpakigtagbo kaniya aron iyang mapasabot ang mga hinungdan kun ngano ang dakbayan sa Lapulapu maoy iyang giuna nga mahimong Lone Congressional District.
Matud pa ni Soon-Ruiz nga kun gikinahanglang dapiton ni Soon-Ruiz si 2nd District Rep. Pablo Garcia pagpasabot niini ngadto sa mga kapitan iyaha kining buhaton. – Romeo Limpangog (BANAT NEWS)