Dengue mikalas og bata

CEBU, Philippines – Padayong misaka ang kaso sa sakit nga dengue sa mga kalungsoran sa probinsya sa Sugbu human dunay laing bata ang namatay sa maong sakit niadtong miaging adlaw sa barangay Palanas lungsod sa Alcantara.

Ang namatay giila nga si Laila Quilaton, 5, kinsa sumala pa ni Dr. Cathy Buscato pangulo sa Provincial Epidemiology and Surveillance Unit (PESU) nga maoy ikatulong bata gikan sa nagkadaiyang kalungsoran sa lalawigan sa Sugbu nga namatay gumikan sa maong sakit. Si Buscato miingon nga padayon pa usab nilang gihingusgan ang pag-edukar sa katawhang Sugbuanon nga kinahanglang ipangyabo ang tubig nga napundo na og pipila ka adlaw nga maoy puy-an ug itloganan sa mga lamok nga carrier sa sakit nga dengue.

Sa iyang bahin, si Rose Haw, dengue coordinator sa Integrated Provincial Health Office (IPHO) mibutyag usab nga gikan sa buwan sa Enero hangtud sa buwan sa Abril ning tuiga, miabot na og 161 na ka kaso sa dengue sa probinsya ug usa na usab ka bata ang namatay sa maong sakit. Matud pa niya nga ang lungsod sa Minglanilla mao gihapon ang nag-una sa mga lungsod nga dunay labing daghan og kaso sa dengue, gisundan kini sa dakbayan sa Talisay, ikatulo ang San Fernando, ikaupat ang Naga, ikalima ang San Remegio ug ika-unom ang lungsod sa Oslob.

Gani karun lang buwana gikataho na usab nga duna pay laing duha ka mga bata ang namatay gumikan gihapon sa maong sakit. – Rey Pasaporte (BANAT NEWS)