CEBU, Philippines – Duna nay taas nga listahan ang Bando Osmeña Pundok Kauswagan (BOPK) alang sa sunod tuig nga eleksyon nunot sa mabakanteng posisyon pagka-konsehal sa siyudad.
Kini maoy gibutyag ni Bise Mayor Michael Rama human usab sa iyang gipatawag nga tigom uban sa mga konsehal sa dakbayan sa nakalabay’ng mga adlaw.
Lima ka mga konsehal sa siyudad ang anaa na sa ikatulo ug katapusang termino ug maoy gipangitaan og hulip ni Rama ug kaubanan.
Kini mao sila si Konsehal Nestor Archival, Christopher Alix ug Sylvan Jack Jakosalem sa north district ug Konsehal Gerry Carillo ug Arsenio Pacaña sa south district.
Nagdumili hinuon pagbutyag si Rama kung si kinsa ang mga kandidatong naa sa ilang listahan apan kini giingong naglakip sa mga kanhi konsehal sa dakbayan.
Una nang gipadayag ni Mayor Tomas Osmeña ang iyang kabalaka tungod kay giingong wala pa molihok si Rama ug kaubanan sa south district samtang ang ilang mga kaatbang sa pulitika nga gipanguluhan ni Jonathan Guardo giingong nagsige na og suroy-suroy sa kabarangayan.
Gipasalig hinuon ni Rama nga sa mosunod nga mga adlaw magtagbo sila si Joy Augustus Young alang sa pagplantsa na sa ilang mga plano.
Subling giendorso ni Osmeña silang Rama ug Young isip standard bearer sa BOPK sa umaabot nga eleksyon.
“Amo nang lingkuran ni Joy (Young) after sa endorsement ni mayor to take up sa initial nga buhatonon namo, meantime, trabaho lang una mi kay there will always be time for everything unya kung dunay visitation that will be part sa among work,” sumala ni Rama.
Bugtong gipasalig sa bise mayor nga duna sila’y lig-on nga mga kandidato sa 2010 elections ug takos nga moserbisyo sa dakbayan. Nanghinaot usab si Rama nga wala nay mosuway paglawgaw sa ilang grupo samtang hulmahon na nila ang ilang mga kandidato. – Elly Bolonos (BANAT NEWS)