PRO-7 preparado sa anti-constituent assembly rally

CEBU, Philippines – Preparado nang daan ang kapulisan dinhi sa rehiyon siete subay ning halapad nga ipahigayong lihok protesta sa mga militanteng pundok dinhi sa Sugbu batok sa constituent assembly nga giduso sa Ubos Balay Balaoranan.

Gibutyag ni Police Regional Office (PRO-7) Chief Supt. Lani-O Nerez nga ang PNP duna nay contingency plan labot sa lihok protesta nga maoy tahasan sa mga lihok protesta sa mga militante.

Sumala pa niini nga maximum tolerance ang ilang ipatuman sa mga polis nga idestino isip crowd control.

Samtang giklaro niini nga wala siya'y gitugtan sa mga polis nga moapil sa maong kalihukan pagsupak sa Con-Ass.

Dunay mga intelligence personnel nga maniid ning mga sakop sa kapolisan nga mag-apil-apil sa politikanhong kalihukan.

Samtang si Arman Perez, secretary general sa Bayan Muna Central Visayas nga gikahinabi sa Banat News nagkanayon nga mokabat sa usa ka libo ang mosalmot sa protest rally karong adlawa.

Matud pa niini nga nagkadaiyang mga grupo sa militante ug ubang sektor, ingon man mga sakop sa Integrated Bar of the Philippines (IBP) Cebu City Chapter ang motambong.

Magsugod ang kalihukan karong alas 9 sa buntag diha sa Fuente Rotunda ug mo-martsa ang grupo paingon sa downtown area ning dakbayan.

Gihulagway niini nga ang maong kalihukan usa lamang ka “opening salvo” sa ilang mas halapad nga lihok protesta   lukop nasud karong Hunyo 12 atol sa katapusang State of the Nation address ni Presidente Gloria Macapagal Arroyo.

Gipasabot ni Perez nga dili sila supak sa pag-amendar sa batakang Balaod apan alang kanila   dili pa karon ang tukmang panahon.

Sumala pa niini nga tataw nga ang desisyon sa mga kongresista nga mipabor niini naggikan sa Malacañang ug napadali ang pagpatuman niini dihang nahitabo nga merger sa Lakas-CMD ingon man Kampi.

Ang Simbahang Katoliko moapil sa protesta batok constituent assembly pinaagi sa mga pag-ampo. - Guam Logroño (BANAT NEWS)