I-kongresista sa BOPK para south ipahibalo ning bulana

CEBU, Philippines – Mahibaw-an na sa sunod buwan kun kinsa ang i-endorso ni Mayor Tomas Osmeña pagka-kongresista sa habagatang distrito sa siyudad.

Kini maoy gibutyag ni Cebu City ABC president Eugenio “Jingjing” Faelnar human usab mahinabi niini ang mayor labot sa ilang line-up sa sunod tuig nga eleksyon.

Matod ni Faelnar nga ipa-survey pa ni Osmeña kun kinsa sa mga sakop sa Bando Osmeña Pundok Kauswagan (BOPK) ang gusto sa mga botante sa ilang distrito.

Matud sa ABC president nga lakip unya sa ipa-survey mao sila si Konsehal Gerardo Carillo ug Rodrigo Abellanosa nga pulos nipadayag og interes sa pagka-kongresista.

Nagkanayon si Faelnar nga gusto nilang makumpleto na ang line-up sa BOPK aron sila makasugod na sa pagpa-ila-ila niini ngadto sa kabarangayan.

Ang ABC president nga kapitan usab sa barangay Guadalupe miingon nga hapit kumpleto na ang mga kandidato sa BOPK sa sunod tuig nga eleksyon gawas lang sa south district.

Subli nang gi-endosar ni Mayor Tomas Osmeña sila Bise Mayor Michael Rama uban kang Education Consultant Joy Augustus Young pagka-mayor ug bise-mayor sa 2010 elections.

Samtang si Cutie del Mar gikataho usab nga maoy kandidato sa BOPK sa amihanang distrito sa siyudad hulip sa iyang amahan nga third termer nga si Kongresista Raul del Mar.

Nasayran nga lima ka mga konsehal sa dakbayan ang anaa na usab sa ikatulo ug katapusang termino ug kinahanglan nang hulipan sa umaabot nga eleksyon.

Apan matud ni Faelnar nga sila wala magproblema niini tungod kay daghan og kapilian ang BOPK nga naglakip sa mga kanhi konsehal sa siyudad.

Lakip sa mga third termer nga mga konsehal mao sila si Jack Jacosalem, Nestor Archival ug Christopher Alix sa amihanang distrito.

Samtang sila si Carillo ug Arsenio Pacaña usab maoy anaa na sa ikatulo ug katapusang termino sa habagatang distrito sa dakbayan. - Elly Bolonos (BANAT NEWS)