Nakapatay nga sikyu gipabuhian

CEBU, Philippines – Gwardiyang nakapusil ug nakapatay og gipasanginlang kawatan sa lungsod sa Consolacion ang gibuhian human usab makiareglo ang pamilya sa iyang napusilan.

Si PO1 Winston Magdadaro sa Consolacion Police Station nga nahinabi sa Banat News miingon nga nahidangat sa ilang buhatan ang pamilya ni Leonido Ybale, 42, taga Tayud sa nahisgutang lungsod ug mipahibalong di na sila interesadong mopasaka og kaso batok sa gwardiyang si Larry Tomarong, 37. Si Tomarong nga nagpuyo sa barangay Ibo, dakbayan sa Toledo nadestino isip gwardiya sa Santiago Shipyard nga nahimutang sa maong dapit.

Giingong nasakpan ni Tomarong si Ybale ug usa ka kauban pa niini nga nanguha og mga puthaw hinungdan nga iyaha kining gigukod ug misangpot sa pagpamusil.

Ang duha ka mga gipasanginlang kawatan gikatahong migamit og sakayan aron makasulod sa shipyard ug naghinay-hinay na sa pagkarga sa ilang mga kinawat dihang naabtan ni Tomarong, ang wala mailhing kauban ni Ybale nakaipsot human molayat sa dagat.

Matud pa ni Magdadaro atubangan sa abogado nagsabot ang duha ka habig ug nahukmang pabuhian ang gwardiya nga gitanggong sa Consolacion police sation. - Romeo Limpangog (BANAT NEWS)