CEBU, Philippines – Mahimo nang mogasto ang Kapitolyo sa mga proyekto sa kalungsoran karong may papel na kini sa pagpalusot sa mga loan sa mga munisipyo sa Development Bank of the Philippines (DBP) human pirmahe ang usa ka Memorandum of Agreement (MOA) tali sa kagamhanan sa lalawigan ug sa DBP kagahapon.
Si Governor Gwendolyn Garcia ug ang usa sa mga Board of Director sa DBP nga si Ramon Durano IV ug mga kaubanan maoy mipirma sa maong kasabutan didto sa Kapitolyo.
Si Garcia miingon nga usa ka landmark agreement ang iyang napirmahan, tungod kay pinakauna kining kasabutan tali sa usa ka provincial government ug sa DBP sa tibuok nasud.
Matud pa ni Garcia nga ang probinsiya sa Sugbu makabintaha sa maong kasabutan ug makatabang pa sa mga kalungsoran nga buot mo-loan alang sa ilang mga dagkong proyekto.
Kini tungod kay samtang magpaabot nga makalusot ang loan sa usa ka lungsod ngadto sa DBP, mahimong makasugod na sila sa ila nang mga proyekto nga gastohan sa kagamhanan sa lalawigan.
Iniglusot na sa maong loan, anha pa mobayad ang kagamhanan sa lungsod ngadto sa Kapitolyo.
Ang gobernadora nagkanayon usab nga ang labing unang makapahimulos sa maong kasabutan sa pautang nga gitanyag sa provincial government mao ang lungsod sa Asturias alang sa ilang water system project, ingon man ang lungsod sa Borbon alang sa ilang Housing Development project . - Chester Abadilla (BANAT NEWS)