Koleksyon sa BOC misaka og 2%
CEBU, Philippines – Ang pagsobra og 2% sa koleksiyon sa Bureau of Customs dinhi sa Puwerto sa Sugbo Port of Cebu sa miaging Abril usa ka kulbahinam , matud pa ni Radi Abarrientos ang Hepe sa Cash Division sa Customs Port of Cebu atol sa pakighinabi sa Banat news.
Matud pa ni Abarrientos nga sa katapusang petsa sa bulan sa Abril puwerte nang kulbaa nila sa kabalaka nga dili sila makaigo sa ilang target nga kolektahunon nga mokabat og P475 milyones gumikan sa kadyutay ra sa mi-file sa ilang entry sa assessment division.
Apan dihang 15 minutos nalang una mag-alas 5:00 sa hapon niadtong Abril 30, 2009, may usa ka entry nga miabot , nga iya sa Global Business sa dakbayan sa Toledo, kinsa nakabayad og P33 milyones sa ilang buhis niadtong higayona.
Ang maong entry dili lamang igo nga naigo ang ilang target nga kolektahunon kon dili misaka pa og 2 porsiyento sa ilang takdang koleksyon para sa Abril.
Si Carlos Corsiga ang Hepe sa Assessment Division sa Customs Port of Cebu nagkanayon nga ang Global Business may bayranan gyud nga balig P120 milyones nga buhisanan sa buwan sa Abril. - Bong Soriano (BANAT NEWS)
- Latest
- Trending