Tresurero sa brgy gikiha'g panglugos sa 12-anyos

CEBU, Philippines – Gipasakaan og kasong pagpanglugos sa Provincial Women’s Commission ang tresurero sa barangay Montealegre, lungsod sa Tuburan kagahapong adlawa sa Provincial Prosecutor’s Office.

Kini human namatud-i nga maoy responsable sa pagpanglugos sa 12 anyos nga babaye niadtong Marso 24 didto sa kakahuyan sa barangay Montealegre, lungsod sa Tuburan.

Ang gipasakaan og kasong pagpanglugos ngadto sa Provincial Prosecutor’s Office mao si Asiclo Talaugon, 60, tresurero sa barangay Montealegre.

Si Bokal Agnes Magpale, chairman sa committee on women sa hunta probinsiyal ug mao usab ang co-chairperson sa Provincial Women’s Commission maoy nangusog nga mapasaka ang maong kaso batok sa tresurero sa barangay Montealegre.

Sigon pa sa 12-anyos nga biktima nga nakaila siya pag-ayo sa suspetsado nga si Talaugon tungod kay kanunay siyang sugo-sugoon niini sa barangay.

Apan niadtong Marso 24 pasado ala 1sa hapon nangahoy ang biktima. Sa iya nang pagpauli gikan nangahoy, kalit lamang siya gibabagan ni Talaugon sa may kakahuyan.

Ang biktima miasoy nga gikuptan ni Talaugon ang iyang duha ka mga kamot, gitakoban ang baba ug giguyod ngadto sa kalibunan ug gipanamastamasan ang iyang pagkababae.

Human malugos ang minor de edad nga biktima, gihulga kini sa suspetsado nga patyon siya ug ang iyang pamilya hinungdan nga sa Abril 18 lang ning tuiga nahiabot sa kapolisan ang maong insidente.

Si PO2 Jenefer Toong sa Women Desk Section sa Tuburan Police Station miingon nga tungod sa kalangay sa pag-report sa maong insidente wala na nila masikop pa si Talaugon kinsa nagtagotago na karon human masayri nga gi-report na sa kapolisan ang iyang paglugos sa 12 anyos nga biktima. - Chester Abadilla (BANAT NEWS)