Taga PDEA-7, PRO-7 nagbinunotay

CEBU, Philippines - Opisyal sa Philippine Drug Enforcement Agency- 7 ug usa ka opisyal sa kapolisan gikatahong nagkatrokis ug nagbinunotay og mga armas atol sa pag-ulbo sa sunog diha sa dalan R.R. Landon nga deriyot mosulod sa ilang mga kampo sakay sa van.

Si Cebu City Councilor Gerardo Carillo sa pakighinabi sa Banat News nagkanayon nga naabtan niya ang chemist sa PDEA-7 ug usa ka dakong opisyal sa Police Regional Office-7 nga nagbinunotay og armas.

Gawas nga nagbunutay hasta siya giingong gibaharan sa maong agent nga pusilon kun di siya pasudlon.

Sa wala pa ang hitabo, gikatahong wala tuguti sa maong polis ang PDEA chemist nga makasulod sa buhatan niini gumikan kay gi-cordon na ang lugar tungod sa nahitabong sunog diha sa ilang luyong bahin.

Si Jessie Tabanao, tigpamaba sa PDEA-7 nagkanayon nga buot mosulod sa ilang chemist nga si Adonis Abueva sa ilang buhatan aron ipagawas ang ilang mga kahimanan lakip na ang pagpagawas sa ilang 14 ka mga detainees kansang prisuhan duol na kaayo sa paril nga ang tupad nga balay gilamoy na og kalayo.

Giingong ang mga kabanay sa mga bilanggo maoy mihangyo nga pagawason sila una diha sa prisuhan tungod sa peligrong maapil unya og kasunog.

Matud pa sa report, si Abueva nagbahis-bahis diha sa dapit samtang nagkaguliyang na ang mga tawo gumikan sa sunog ug ang kapolisan mibutang na og mga cordon sa lugar aron walay si bisan kinsang walay labot nga makasulod.

Apan dihang nagmaneho kini sa van paingong mo-u-turn nadasmagan niini ang maong police official nga gikasuko usab sa nauwahi ug giingong gihapak niini sa bukobuko ang ahente ug giingnang di na pasudlan ang dapit.

Gumikan niini nibalik sa agi si Abueva   apan nianang tungura naabot si Carillo ug subling giingnan si Abueva nga di pasudlon sa PDEA office.

Ang maong agent gikatahong gibabagan sad ni Carillo ug ning tungura gibaharan siya (Carillo) niini nga pusilon kun di siya pasudlon.

Nasuta nga nakasuot lang og sibilyang sinina si Abueva niadtong tungura ug napakgang ra ang kainit sa tulo dihang miabot si Supt. Rex Derilo sa FESAGS-7 kansang buhatan tupad ra usab sa PDEA.

Si Derilo daling gisultihan si Carillo ug ang maong police official nga agent sa PDEA si Abueva ug kinahanglang makasulod kini aron makuha ang mga importanteng butang sa ilang buhatan ug mapagawas ang mga bilanggo.

Apan si Tabanao miklaro nga walay nahitabong sukmagay, bunutay og armas ug baharay atol sa maong insidente ug posibleng bunga ra kadto sa kainit sa ulo tungod sa sunog nga nahitabo.

Si Carillo sa iyang bahin miawhag ni City Fire Marshal Ismael Codilla nga imbestigahon ang maong insidente ug buot niining mailhan kung si kinsa ang maong police official.

Samtang si Codilla sa iyang bahin misaad nga dunay buhatong lawom nga imbestigasyon kabahin sa nahitabo. (BANAT NEWS)