Mga nataktak gihatagan og trabaho ni Cortes

CEBU, Philippines - Si Mayor Jonas Cortes sa dakbayan sa Mandaue mihatag og trabaho sa 34 ka mga trabahante nga gitaktak sa ilang gitrabahoang nanira kay naapektahan sa global economic recession.

Anaa sila patrabahoa sa dredging project sa Mantuyong Creek ug reroofing sa training center sa dakbayan, nga pulos ubos nsa superbisyon sa City Engineer’s Office .

Ang maong mga trabahante gitangtang sa trabaho dihang nanira ang mga kompaniya sama sa Giardini del Sole, Maithland Smith, Wicker and Vine, MEPZ, Cebu Mitsumi, Goodwill Industries, Mehitabel ug ubang furniture firms diha sa dakbayan.

Ang paghatag kanila og trabaho gihimo ubos sa tulo ka bulan nga Emergency Employment Program (EEP)sa Department of Labor and Employment (DOLE) .

 Ang 80 porsiyento sa minimum nga suhol sa maong mga trabahante, kuhaon gikan sa P300,000 nga pundo sa DOLE alang sa dakbayan, ug 20 porsiyento nalang ang abagahon sa dakbayan sa suweldo sa maong mga mamumuo.

Ang maong kantidad gitunol sa DOLE ngadto kang Mayor Cortes atol sa Job Fair kaniadtong Enero 31 ug Pebrero 1, 2009 alang sa EEP sa DOLE.

Midugang si Cortes nga gipalihok usab niya karon ang City Cooperative Office aron katabangan ang mga mamumuo nga makanegosyo pinaagi sa kooperatiba.

Ang mayor miumol sa usa ka task force on emergency employment ubos sa pagpanguna ni Manlalaban Ernesto Maringuran sa City Cooperative office aron mohatag og trabaho niadtong gitangtang sa ilang mga trabaho sa mga kompaniya nga apektado sa global economic crisis. - BANAT NEWS