Phil. Army: enrol mo sa ROTC

CEBU, Philippines - Nanawagan ang Philippine Army ngadto sa mga batan-on nga moapil ug mo-enroll sa ROTC karong abli sa klase.

Si Capt. Christopher Mugot, civic military officer sa Philippine Army nga nahinabi sa Banat News nagkanayon nga daghan kaayong makat-onan ang usa ka batan-on kun mosalmot sa Reserve Officer Training Course (ROTC) kun itandi sa Civil Welfare Training Service (CWTS).

Gibutyag ni Mugot nga mas daghan karun ang mga babaye nga miapil sa ROTC diha sa University of San Jose Recoletos (USJ-R) kun itandi sa mga lalaki. Wala hinuon siya makahatag og katin-awan kun nganong minus ang gidaghanon sa misalmot nga mga lalaki.

Gitataw ni Mugot nga mas paspas ang employment sa mga aplikante nga dunay background sa ROTC ikomparar sa uban nga wala gyuy kasinatian sa training.

Tudloan ang mga tinun-an sa ROTC sa first aid, map reading, emergency preparedness, marksmanship, pinaagi sa M16 ug 45 kalibre nga pistola.

Matud ni Mugot nga kaniadto ang mga tinun-an sa ROTC wala giapil ang pagtudlo niini ang depensa sa iyang kaugalingon apan karun kun magpa-enroll ang usa ka tinun-an tudloan na kini og Aikido, tudloan unsaon magpabuto sa 105 mm cannon ug pasakay-sakayon sa helicopter.

Gani matud niya nga dunay gitanyag karon nga scholarship program sa usa ka tinun-an nga makadawat og P9 mil ngadto sa P12 mil kada semester nga nag-enroll og scholarship.

Lakip sa gitanyag niini mao ang pension sa edad nga 65, ang nakanindot kay wala nay gi-require karun nga uniporme ang ROTC kun dili t-shirt ug pantalon na lang ang gamiton.

Matud ni Mugot nga tudloan usab karon ang mga tinun-an sa ROTC og “values” aron mamahimong usa ka maayong Filipino Citizen unya awtomatikong reserve personnel sa Philippine Army human sa graduation sa Basic ROTC.

Hinuon, mahimong makapadayon ang kadete sa ROTC ngadto sa Advance ROTC ug kun mogradwar, mahimong opisyal sa Philippine Army nga magsugod ang ranggo sa pagka-2nd Lieutenant. - Rey B. Pasaporte (BANAT NEWS)