Pilipinas moprotesta vs Taiwan - Cerge

CEBU, Philippines – Naglaraw ang Sugbuanong Press Secretary   Cerge Remonde pagsang-at og protesta sa nasud sa Taiwan pinaagi sa World Health Organization (WHO) tungod sa pasangil sa maong nasud nga ang mga Filipina Workers maoy courier sa flu virus nga nakasulod sa ilang nasud.

Nasayran nga niadtong nakalabay nga semana migawas sa usa ka national newspaper sa nasud sa Taiwan nga nagkutlo sa usa ka doktor nga mitumbok sa mga Filipina workers nga matud pa nagdala sa sakit nga flu virus sa ilang nasud.

Si Remonde nga nahinabi sa DyRF nagkanayon nga tumotumo lang ang maong pasangil tungod kay ang Pilipinas wala maigo sa flu virus busa dili gyud mahimong courier sa maong sakit ang mga Filipina workers.

Apan gitumbok ni Remonde nga iyang ipasusi ang maong pasangil sa usa ka doktor sa Taiwan pinaagi sa Department of Health (DOH).

Gitataw usab ni Remonde nga sa maong isyu ang kagamhanan sa Pilipinas makig-alayon sa World Health Organization pinaagi sa pagsumiti sa resulta unya sa pakisusi sa DOH kun mamatud-ang tumo-tumo lang ang maong pasangil. –BANAT NEWS