CEBU, Philippines - Gihingusgan karon sa Cebu City Senior Citizens Council (CCSCC) nga masugdan na paghatag ang cash assistance sa siyudad ngadto sa mga senior citizen (SC) sa dakbayan.
Kini agig pagtuman sa campaign promise ni mayor-on-leave Tomas Osmeña nga usa ka libo ka pesos nga ihatag sa ilang birthday ug laing usa ka libo ka pesos nga pinaskuhan.
Sa nasayran, duna nay gigahing P50 milyones ang kagamhanan sa dakbayan nga gikuha gikan sa kapin sa P250 milyones nga surplus sa miaging tuig.
Matud sa deputy chairman sa CCSCC nga si konsehal Rodrigo (Bebot) Abellanosa nga ila karong gipadali ang mga application form alang sa maong katuyoan.
Kini aron maduso ngadto sa City Council ug maaprobahan, sa ingon, maapod-apod usab ngadto sa mga senior citizen sa kabarangayan ug mapirmahan.
Matud ni Abellanosa nga kung walay mga kakulian sa ilang gihimo nga proseso posibling masugdan na paghatag ang cash assistance karong sunod buwan.
Gipaniguro sa konsehal nga dili na masubli ang kagubot nga nahitabo niadtong miaging Disyembre atol sa pagpanghatag og basket of goods sa City Hall ngadto sa mga SC.
Nasayran nga daghang mga SC ang nangasuko pagpanghatag sa maong pinaskohan tungod kay sila giingong wala makadawat niini.
Gitataw ni Abellanosa nga dunay proseso nga ilang gisunod sa ila unyang paghatag sa cash assistance sama sa pagpangayo og requirements sa mga SC
Gawas sa pagpirma og application form miingon ang konsehal nga gikinahanglan usab niini ang Comelec certification nga botante sa siyudad ug nakabotar sa miaging eleksyon ang maong SC
Labaw sa tanan, gikinahanglan usab sa mga SC nga makapresentar og Identification (ID) sa Cebu City Office of the Senior Citizens Affairs (OSCA). - BANAT NEWS