Cebu - Gumikan sa panaglalis bahin sa yuta, giligid og tigbas sa usa ka mag-uuma ang iyang maguwang ginamit ang sanggot didto sa sitio Lingaob, barangay Takay, lungsod sa Sogod niadtong miaging hapon.
Ang biktima mao si Eduardo Medado, 63, usa usab ka mag-uuma nga taga Lingaob, samtang ang suspetsado mao ra usab ang iyang manghod nga si Mario Medado, hingkod, ug silingan ra sa biktima.
Si SPO3 Joemiller Baticuang, kauban nila ni SPO1 Melianito Baladjay, PO2 Eliezer Casinto maoy mitubag dayon sa alarma ug mibutyag nga sa wala pa ang pagpanigbas mahitabo, ang biktima miadto sa balay sa suspetsado aron pangayoon ang iyang bahin sa yuta.
Apan sa way igong hinungdan ang suspetsado mihiwasa sa kasuko ug gilanit niini ang sanggot nga gitangkil sa iyang hawak ug walay kukaluoy nga giligid og tigbas ang iyang maguwang.
Ang biktima nasabak sa tuo ug walang kamot ug sa walang bahin sa iyang nawong.
Dihang naluya og tinigbas ang suspetsado misirit kini pahilayo ug wala na hiabti sa kapolisan.
Ang biktima gihatod dayon sa duol nga hospital aron matambalan ang mga samad nga iyang naangkon.
Gipapangita na karon sa kapolisan sa Sogod ang suspetsado aron kapasakaan og kaso. - BANAT NEWS