Lolo nga drayber gibunalan patay

Cebu - Usa ka 73 anyos nga drayber sa traysikad kinsa gituohang gipusposan, napalgang patay sulod sa iyang payag sa sitio Bulobugan, barangay Tahaw, lungsod sa Pinamungahan kagahapon sa buntag.

Ang biktima nailhan nga si Amado Moreno, 73 , nga taga Tahaw, kansang ulo hapit moliki agi sa usa ka butang nga gahi nga gibunal kaniya sa wala hiilhing kriminal.

Si SPO2 Allan Tundag sa Pinamungahan Police Station nagkanayon nga malagmit namatay ang biktima niana pang Huwebes sa gabii ug niana nang pagkabuntag sa Biyernes madiskitai sa iyang apo nga patay na kini.

Naglisod pagtumbok ang kapolisan nga kawat ang motibo sa maong pagpatay kay ang P100 nga kuwarta sa biktima diha raman sa bulsa niini. - BANAT NEWS