Cebu - Moabot sa 600 ka mga sakop sa Department of Public Services (DPS) sa Cebu City Hall lakip na sa mga volunteers ang manglimpyo sa kadalanan human sa Sinulog 2009.
Kini maoy gipahibawo sa labaw sa DPS nga si Engineer Dionisio Gualisa subay usab sa nagkaduol na nga pagpahigayon sa tinuig nga kalihukan sa dakbayan.
Gipadayag ni Gualisa nga andam na ang iyang mga sakop sa tagsa-tagsa nila ka mga tahas ilabi na ang mga garbage collector sa siyudad.
Gipasalig ni Gualisa nga malimpyo ang kinatibuk-ang dakbayan partikular na sa Sinulog route sa dili pa ang alas 4:00 sa kaadlawon sa adlaw’ng Martes.
Wala pa hinuoy klaro kung mahatagan ba og incentives ang mga sakop ni Gualisa ingon man ang mga volunteer niini tungod kay walay gipasalig si acting mayor Michael Rama sukwahi sa gihimo kaniadto ni mayor-on-leave Tomas Osmeña.
Kahinumduman nga si Osmeña matag tuig mohatag og tagsa ka sakong bugas ngadto sa mga sakop sa DPS nga manglimpyo human sa Sinulog.
Gipasabot hinoon ni Rama nga ang incentives mosunod lang kung iyang makita nga ang mga sakop sa DPS angayang hatagan niini.
“I would like to see results first before we think of it because as I said, in rewarding, we might develop culture of working hard only if there is reward,” sumala ni Rama.
Sa pikas bahin giawhag usab ni Gualisa ang kabarangayan sa dakbayan nga dili mohunong sa ilang naandan nga pagpangolekta sa basura. – BANAT NEWS