Cebu - Buot unta magpakamatay pinaagi sa paghikog ginamit ang pisi ang usa ka piniriso sa lungsod sa Minglanilla apan naabtan pa kining buhi pa nga nagbitay sulod sa selda alas 9:15 sa milabay'ng gabii.
Ang maong piniriso giilang si Gerald Labrador, 37, nagpuyo sa Ward-II sakop sa maong lungsod kinsa napriso niadto pang Disyembre sa wala pay Pasko tungod sa kasong child abuse nga gipasaka sa ilang silingan.
Matud ni PO1 Jade Abrica sa Minglanilla Police sa dihang nahinabi sa Banat News mibutyag nga ang ilang radio operator maoy unang nakabantay sa maong suway nga paghikog dihang mipaka ang selda.
Naatol usab kini nga namalik gikan miresponde sa alarma ang nag-duty nga team ug nakit-an ang iyang kahimtang ug gidali pagkanaog dayon gidala ngadto sa Minglanilla District Hospital.
Si Labrador migamit og habol nga iyang gilubid ug gihikot sa iyang liog ngadto na sa rehas sa selda aron unta magpakamatay. Apan naabtan pa siyang nawad-an og panimuot ug nadala sa tambalanan.
Paglabay sa lima ka oras nabalikan sa panimuot ang piniriso ug gi-release kini ug gitanggong og balik sa prisohan.
Nasayran nga naproblema kini sa iyang kaso tungod kay walay abogadong molaban kaniya ug manganakay na ang iyang asawa sa ilang ikaupat nga anak hinungdan nga buot na lang unta kining magpakamatay ilabi na kay wala nay nangita alang sa adlaw-adlaw'ng panginahanglan sa iyang pamilya. – BANAT NEWS