BSP wa pay desisyon sa RBS nag-bank holiday

Cebu - Wala pay desisyon ang Bangko Sentral ng Pilipinas kun ipaubos na ba sa receivership sa Philippine Deposit Insurance Corporation (PDIC) ang Rural Bank of Subangdaku (RBS) sa siyudad sa Mandaue nga kalit nga nideklarar og bank holiday sugod niadtong Lunes.

Gibutyag ni Rogelio Garcia, manager for corporate affairs sa Bangko Sentral ng Pilipinas sa dihang nahinabi sa Banat News nga sukad kagahapon wala pay gipakanaog nga opisyal nga kamanduan ang monetary board kabahin sa maong bangko.

Hinuon gipahibalo ni Garcia nga gitakdang magtigum karong Huwebes ang mga sakop sa monetary board aron mopagawas og resolusyon alang sa pagpa-ubos sa receivership ubos sa PDIC sa maong bangko.

Matud ni Garcia human unya mapaubos sa receivership ang maong bangko susama sa nahitabo sa ubang mga bangko nga nanirado niadtong milabay’ng Disyembre nga sakop sa Legacy Group of Companies mo-take over dayun ang PDIC pag-process sa tanang claim sa mga depositor.

Nunot niini mi-apelar si Garcia ngadto sa tanang mga depositor sa RBS nga magpailob lang kini og gamay’ng panahon ug magpaabot sa opisyal nilang notisya nga ipahibawo alang na sa pagsugod og asikaso sa ilang mga claims.

Apan ang RBS bank napugos pagpatuman og bank holiday niadtong Lunes tungod sa grabe sa kadaghan sa mga depositors nga nang-withdraw sa ilang deposito. – BANAT NEWS