CEBU - Patay ang usa ka ginang human kini aksidenteng nakuryentihan sa buhing linya sa kuryente sa sitio Tambis barangay Pooc siyudad sa Talisay sa nilabay’ng alas 8:00 sa gabii.
Ang biktima nga gideklarar sa mga doctor nga dead on arrival sa Talisay City District Hospital mao si Mildred Luway, 27, nagpuyo sa nahisgutang lugar.
Matud ni PO1 Oliver Dacua sa Talisay City Police dihang nahinabi sa Banat News, ang biktima aksidenteng nakahikap sa hayhayan nga nakahigot diay sa ground wire sa usa sa mga poste sa Visayan Electric Cooperative nga duna diay nagsubay nga kuryente hinungdan sa iyang pagkakuryente.
Wala nay panimuot ang biktima dihang gitabang sa mga silingan human matapot sa maong hayhayan nga padayon niyang gikuptan ug nakaangkon na og mga sunog sa tibuok kalawasan.
Gisuwayan unta kini pagdala sa maong tambalanan apan patay na gyud kini sumala pa sa mga doktor.
Sa paghimo ning balita padayun pa ang imbestigasyon sa kapulisan paghipos og dugang kasayuran ug pagtino kung duna bay mabasol ug angayan bang manubag ang Veco sa maong aksidente . BANAT NEWS)