Sobra P1M nga kabtangan ang gipangawat sa planta

Cebu - Sobra sa usa ka milyon ka pesos ang kinatibuk-ang kantidad sa mga gipangkawat nga construction materials sa Cavite Ideal International kon Cavdeal nga nagbase sa barangay Magdugo siyudad sa Toledo.

Ang manager sa maong kompaniya nga si Mike Espiritu maoy nireport sa kapulisan ug nisumbong nga gipangawat ang mga butang nga naglangkob sa mga kahimanan sa aluminum asphalt plant; 50 metros nga asphalt plant conveyor belt nga 52 ka buok; 1 unit 380 volts 3 phase type asphalt plant; 1 unit asphalt plant oil burner; 1 unit 15kw 380 volts asphalt plant electric gear conveyor motor; 1 unit 10kw motor 380 volts asphalt plant electric motor ug 1 unit asphalt plant electric motor.

Ang maong mga nahanaw nga butang gibana-bana sa manager nga mokantidad og sobra sa usa ka milyon ka pesos.

Matud ni SPO3 Gil Lastimosa sa Toledo City Police dihang nahinabi sa Banat News subay sa gihimong imbestigasyon alas 12:30 sa udto niadtong Miyerkules nadiskubrehan nila ang pagkahanaw sa maong mga butang dihang nipahigayon sila og inspeksyon.

Gipangita na usab karon ang duha ka gwardiyang mao untay nagbantay nga pulos mga sakop sa Vesda Security Agency nga nagbase sa dakbayan sa Mandaue kinsa wala na diha sa ilang posts.

Hinuon gireport ang maong panghitabo niadto lang Huwebes sa alas 10:40 sa buntag ug gikunsiderar karun ang tanang anggulo lakip na ang posibilidad nga kakunsabo ang duha ka gwardiya. – BANAT NEWS