CEBU - Kanhi hepe sa Traffic Division sa Talisay nga atua na madestino sa Minglanilla Police Station gipasanginlang nanagpa og drayber sa traysikol niadtong Lunes sa buntag sa atubangang bahin sa simbahan sa Ward IV Poblacion, Minglanilla. Si PO3 Joseph Glenn Burlas gireklamo sa usa ka Allan Caballero, 37, taga barangay Tungkop tungod sa pagpanagpa ug pagpanion sa iyang service firearm.
Si Caballero ug PO3 Burlas gihusay atubangan ni Kapitan Olga Fiel sa Tungkop.
Sumala sa report nga si Caballero nagparada sa iyang traysikol atubangan sa simbahan samtang naghulat mahuman ang Santos nga Misa ug manggawas ang mga nanimba.
Ang polis nga mopaingong mo-duty mipaatras sa iyang Pajero ug naigo ang traysikol ni Caballero, apan walay kadaot nga naangkon.
Miusab og paatras si PO3 Burlas sa iyang sakyanan apan gipikpik ni Caballero sa pagtuo niini nga maigo pag-usab ang iyang traysikol.
Human sa pagpikpik, mipalugar si PO3 Burlas sa iyang sakyanan ug nanaog dayong tion og armas ngadto sa mga drayber ug miingon “kinsay isog ninyo?”
Giduol ni PO3 Burlas si Caballero ug gilamparo.
Si PO3 Burlas sa iyang bahin miangkon nga natandog iyang garbo pagpikpik ni Caballero sa iyang sakyanan. Apan mihimakak kini nga nanion siya og armas.
Si PO3 Burlas nagkanayon atol sa husay atubangan ni Kapitan Fiel: “Ako Kap, I was trained to kill people.”
Si Cebu Provincial Police director Carmelo Valmoria nagkanayon nga angay ipa-ubos sa imbestigasyon si PO3 Burlas tungod sa iyang pagpanagpa ni Caballero.
Matud ni Valmoria nga iyang imbitahon si Caballero aron kuhaan og personal nga pamahayag kalabot sanahitabo.
Gimandoan usab ni Valmoria ang hepe sa Minglanilla sa pag-imbestigar sa hitabo ug pagsumiter og report ngadto kaniya. – BANAT NEWS