Gipadayag ni Mayor Jonas Cortes ang tinguha niyang ipasakop sa Philhealth Insurance ang kaliboan ka mga kabus sa kabarangayan sa dakbayan sa Mandaue.
Kini iyang gibutyag atol sa iyang pagpamulong sa ika-207th Solidarity Week celebration didto sa Mandaue City Sports and Cultural Complex niadtong miaging adlaw nga gitambongan sa nagkadaiyang kahugpongan sa mga urban poor.
Matud pa niya nga ang paghatag og kasigurohan sa mga kabus pinaagi sa pag-pamiyembro niini sa Philhealth dako kaayong abag sa ilang panglawas ug sa kahimtang sa pagpuyo.
Midugang ang mayor nga nag-unang problema sa mga kabus sa dakbayan mao ang kaapiki sa kuwarta sa higayong magmasakit ug madala sa tambalanan gumikan kay maglisod kini sa pagbayad sa doktor ug sa pagpalit og tambal.
Sa nasayran nga ang maong programa daan nang gipatuman sa administrasyon pa ni kanhi Mayor Thadeo Z. Ouano diin kaliboan ka mga kabus sa kabarangayan ang nakapahimulos niini.
Ang maong programa ni Ouano kaniadto iyang gidugtong sa Philhealth program sa lalawigan sa Sugbu pinaagi kang Gobernador Gwen Garcia nga napahimuslan na usab sa kaliboan ka mga katawhang kabus sa dakbayan.