'Tandang Sora' costume ni Gwen gikataw-an ni Tom

CEBU - Gikataw-an lang ni Mayor Tomas Osmeña ang paukyab nga gihimo ni Gobernadora Gwendolyn Garcia niadtong miaging adlaw.

Kini maoy gibutyag ni City Administrator Bimbo Fernandez human usab niini nahinabi ang mayor sa telepono kagahapong adlawa.

Ang gobernadora nagsapot og ala-“Zorro” agi’g pahiuyon sa giingong pagtawag kinaya sa mayor nga “Tandang Sora.”

Sa pikas bahin niingon si Fernandez nga nangumusta usab ang mayor sa pagbisita ni Garcia sa South Road Properties (SRP).

Unang ginaog sa gobernadora ang SRP kagahapon atol sa pagsugod sa iyang tulo ka adlaw nga Suroy-Suroy Sugbu 2008 Southern Heritage Trail.

Partikular nga gitan-aw ni Garcia ang dapit sa SRP nga gustong paliton sa Filinvest Land Incorporated kay kini giplanuhang puhalan sa Kapitolyo.

Nagkanayon si Fernandez nga nakapangutana ang mayor kung wala ba magsul-ob si Garcia sa ala-Zorro costume niini pagbisita sa SRP.

“Nangumusta lang ang mayor kung nag-wear ba pud kuno sa Zorro costume si Garcia sa pag-adto ani sa SRP,” sumala ni Fernandez.

Matud sa City administrator nga nasayod na si Osmeña sa plano sa Kapitolyo sa SRP ug kini giingong wala mabalaka nga puhalan ang tanyag sa Filinvest.

Ang Filinvest gusto nga mopalit og napulo ka ektaryang lona diha sa SRP gawas sa paggamit niini sa laing 40 ka ektarya pinaagi sa pagpakig-joint venture sa siyudad.

Sa gipadala nga text message sa mayor iyang gidugang nga siya wala na masurpresa sa laraw sa gobernadora pagpadayag og interes sa SRP.

“Of course, Gwen will not invest in her own kingdom of darkness, it’s so backward, specially in her father’s district,” tipik sa text message ni Osmeña.

Nasayran nga ang Kapitolyo pormal nang nipadangat ngadto sa City government sa tinguha niini pagpalit og luna diha sa SRP.

Apan taliwa sa kadako sa SRP maoy gusto sa kagamhanang probinsyal nga maangkon ang luna nga nagustuhan usab sa Filinvest. – BANAT NEWS