CEBU - Pormal nang gitak-opan ang lima ka adlaw’ng pagbansay sa mga sakop sa kapolisan sa International Crime Investigative Training Assistance Program( ICITAP) nga gipahigayon didto sa Cebu Marine Resort sa Brgy. Suba, Basbas dakbayan sa Lapulapu sa milabay’ng adlaw.
Ang maong training gipasiugdahan sa Departamento sa Hustisya sa Estados Unidos nga gisalmotan sa mga sakop sa kapolisan sa dakbayan sa Marawi, Zamboanga, Palawan ug Lapulapu.
Si PRO 7 Regional Director P/CSupt. Ronald Roderos nga maoy pinasidunggang dinapit sa maong training mipadayag sa kamahinungdanon sa maong pagbansay gumikan kay dinhi nila makita kung unsay angayang himuon sa usa ka sakop sa polis nga makalapas sa iyang katungdanan.
Sa 34 ka mga polis nga migraduwar sa maong training,16 niini gikan sa dakbayan sa Lapulapu, 7 gikan sa Marawi City Police Office, 6 gikan sa Zamboanga City Police Office ug ang 5 gikan sa Puerto Princessa Provincila Police Office kinsa pulos mga imbestigador. - Bong Soriano (BANAT NEWS)