Gullas mipapanumpa sa reporters sa Talisay

CEBU - Malampuson ang oath taking sa mga napiling opisyal sa Media in Cebu South (MICS) nga gipahigayon sa club house sa dakbayan sa Naga niadtong Sabado sa alas 5:00 sa hapon.

Si Kongresista Eduardo Gullas sa unang distrito sa lalawigan sa Sugbu maoy mipapanumpa sa maong mga opisyal.

Ang MICS mao ang kanhi Talisay City Reporters Organization (TCRO) nga grupo sa mga beat reporters nga nagbase sa dakbayan sa Talisay.

Apan karon gilakip na sa MICS ang pagkuha sa mga balita sa tibuok unang distrito sa Sugbu.

Si Gullas nagkanayon nga nahinangop siya nga gipalapdan pa sa grupo ang ilang coverage ug labi niyang gikalipay tungod kay siya maoy napiling mopahural sa mga opisyal sa MICS.

Matud ni Gullas nga bisan og aduna siya’y ubang mga gimbuhaton niadtong Sabado apan gihatagan gyud niya og panahon ang MICS tungod kay tipik sa iyang dughan ang mga sakop sa media kay siya usa man usab ka kanhi media practitioner.

Gani iyang giasoy nga nahimo siyang kani acting editor in chief sa The Freeman ug writer usab dihang estudyante pa siya sa Santo Tomas.

Si Gullas misaad nga mohatag og suporta sa tanang proyekto nga himuon sa MICS. Agig tabang sa taga media gibutyag ni Gullas nga may gipundo siyang P8,000 para sa medisina ug P12,000 para surgery sa mga taga media nga magmasakit ug mapaslak diha   sa Vicente Sotto Memorial Medical.

Ang gikinahanglan lang sa mga sakop sa media nga magpatambal sa maong tambalanan, mao ang pagpresentar sa ilang valid identification (ID) sa ilang mga lehitimong organisasyon.

Ang mga napiling opisyal sa MICS, Presidente: Marlon Belleta sa DYAB-Abante Bisaya, Bise Presidente: Gary Cabotaje sa Sun Star Daily, Secretary: Liv Campo sa The Freeman, Treasurer: Daniel Guden sa DYRF-Radyo Fuerza, Auditor: Brenda Batuto sa Banat News, PRO: Gabriel Bonjoc sa DYSS, Adviser: Vincie Monterde sa Super Balita, Jun Megallen, Sports Editor sa Super Balita.

Ang mga mitambong sa nahisgutang kalihukan mao ang mga konsehal sa dakbayan sa Talisay nga sila si Alan Bucao, Edward Alesna, Arturo Bas, Rodi Cabigas, Aaron Capala ug Shirley Belleza ug si Konsehal Concordio Mejias sa lungsod sa Minglanilla.

Ang officer in charge sa Talisay City Police Station nga si Senior Inspector Jovito Canlapan ug ang kanhi Customs Collector nga si David “Boy” Odilao ang misaksi usab sa kalihokan. – BANAT NEWS