CEBU - Gihigpitan sa kapolisan sa dakbayan sa Talisay ang pagbantay sa tanang sam-ang publiko ug pribado sa maong lugar tungod kay matag adlaw sa minatay, molab-as sa panumdoman sa tanan ang ngilngig nga nahitabo niadtong 1980 dihang gibombahan og dinamita ang menteryohang publiko niini diha sa iyang barangay Poblacion ug may kapin kon kulang 10 ka tawo ang nakalas.
Si Police Inspector Jovito Canlapan,officer-in-charge sa Talisay City Police Station mibutyag sa Banat News nga sukad pa niadtong Biyernes gipa-roving na niya ang iyang mga sakop nga polis sa lima ka mga sam-ang sa maong dakbayan.
Ang maong mga sam-ang publiko nahimutang sa barangay Poblacion, Cansojong ug Tangke, samtang ang sa Mohon tua nahimutang ang Cebu South Memorial Garden nga usa ka pribadong menteryo.
Ang Evergreen Memorial Garden, usa usab ka pribadong menteryo nahimutang sa south coastal road sa barangay San Roque, ug kining tanang menteryohan sa Talisay higpit nga gi-monitor sa kapolisan aron pagsiguro nga walay mga dautang panghitabo niining pagsaulog sa Kalag-kalag.
Matud pa ni Inspector Canlapan nga gawas sa mga polis, may kaabag usab kining mga barangay tanod ug Barangay Intelligence Network (BIN) ug ang matag menteryo may kaugalingong mga guwardiya nga gitawag nga “blue guard”.
Kagahapon sayo sa buntag gikatagkatag na ang mga polis ngadto sa mga sam-ang ug gibantayan pag-ayo ang mga katawhan nga walay magdala og armas de fuego, ug mga mahait nga hinagiban .
Sa sayo pa daan nang gipasidaan sa kapolisan nga gidili ang mag-inom og ilimnong makahubog sulod sa menteryo ug gani ang mga tindahan sa duol gidid-an sa pagpamaligya og bino.
Gipalihok usab ang Guardian Brotherhood ug “PARAK”, nga mga grupo nga Non-Government Organization(NGO) nga boluntaryong miabag sa kapolisan aron masiguro ang kahapsay ug kalinaw sa pagsaulog sa Kalag-kalag. – BANAT NEWS