Nag-inom biktima sa drive-by-shooting

CEBU – Nabuslot ang tiyan sa usa ka standby human pusila sa “drive-by-shooting” nga mga kriminal kagahapon sa alas 4:00 sa kadlawon diha sa may Gorordo Avenue barangay Camputhaw ning dakbayan.

Ang biktima mao si Ramil Bolo, 39, ulitawo, nga taga Camputhaw, kinsa nasabak sa ubos nga bahin sa iyang tiyan sa wala pa matinong kalibre sa armas de fuego.

Sa imbestigasyon sa kapulisan nasayran nga ang biktima nakig-inom sa iyang barkada nga si Paolo Ledesma ug mga kaubanan diha sa daplin sa dalan.

Apan kalit lang mibadhas ang usa ka motorsiklong sipa kaayo og tambutso nga gisakyan sa tulo ka wala hiilhing tawo ug misinggit nga “Fuck You”.

Maoy hinungdan nga gibadlong kini sa biktima samtang mipadayon kini sa pagdagan sa unahan.

Apan wala magdugay kalit lang nibalik ang maong motorsiklo ug paghitungod sa nahimutangan sa biktima ug mga kauban, usa sa mga backrider niini mipauwan og mga bala ngadto sa nahimutangan nila ni Bolo.

Nasabak ang biktima sa usa ka bala sa iyang tiyan samtang misutoy og padagan ang drive-by-shooting nga mga kriminal ngadto sa Ayala ug ang biktima gidala dayon sa iyang mga kauban ngadto sa duol nga tambalanan. – BANAT NEWS