CEBU -Mga suspek sa pagpusil ug pagtulis sa usa ka German national sa Gunter Compound sitio Quarry, barangay San Roque lungsod sa Asturias niadtong Domingo sa gabii wala pa gihapon mailhi sa kapolisan.
Matud ni PO3 Jose Claro Hoyohoy, desk officer sa Asturias Police Station dihang nahinabi sa Banat News wala pa usab matino kung pila ang kantidad nga nakuha sa mga tulisan sa balay ni Mark Herbert Gunter, 65, minyo sa usa ka Pilipina.
Sumala pa sa kapolisan bag-uhay pang mi-withdraw og kwarta sa bangko ang maong langyaw'ng negosyante nianang sayo pa.
Si Gunter kritikal karun ang kahimtang sa South General Hospital sa siyudad sa Naga human makaangkon og samad pinusilan sa tuong bahin sa abaga niini.
Subay sa inisyal nga report ang duha ngadto sa tulo ka mga suspek diha na kini sa sulod sa kwarto sa biktima atol sa pagsulod niini ug naaktuhan gyud nga nangukay sa mga kagamitan diha sa lawak.
Dihang iyaha kining gisitar usa sa mga tulisan ang mipusil kaniya, gidudahang kaila ra sa biktima ang mga tulisan ug taga diha ra kini tungod kay nakahibawo kini nga bag-ohay pang mi-withdraw og kwarta ang maong langyaw. (BANAT NEWS)