CEBU - Nagdumili pagluwat og baruganan si Cebu City Councilor Sylvan Jakosalem kung angayan na ba nga ipatuman niining panahuna ang fare reduction.
Apan kini miawhag sa mga hingtungdang ahensya sa pagdali og kwentada sa presyo sa lana ug sa mga piyesa ingon man sa kinitaan sa mga drayber aron masuta kung gikinahanglan na ang fare reduction.
Ning bag-uhay lang sunod-sunod nga mipaus-os ang mga kompanya sa lana ug oil price rollback tungod kay nibarato na ang produktong petrolyo sa world market.
Si Jakosalem nga maoy chairman sa Committee on Transportation sa City Council niingon nga iya na lang itugyan ngadto sa hingtundang ahensya ang paghukom niini.
“Gikinahanglan man gud na nga i-compute ba, so, ang Land Transportation Franchising and Regulatory Board (LTFRB) ray nakahibawo ana, ang akong hangyo nila nga dalion lang sa pag-compute ba, dalion nila og desisyon ug dili paabton og unom ka buwan,” nagkanayon ang konsehal.
Nasayran nga gitakda na sa LTFRB-7 unya sa Septiyembre 30 ang pagtuki sa fare reduction petition nga gisang-at ni Attorney Manuel Iway kinsa nagtinguhang mabalik sa P6 ang minimum fare gikan sa kasamtangang P8, ug tangtangon usab ang P10 nga add-on sa mga taxi.
Alang kang Iway wala nay rason aron magpabiling mahal ang pletihan tungod usab sa sunod-sunod nga oil price rollback.
Apan ang mga kahugpungan sa mga drayber gipaabot nga mosupak niini.
Gani ang secretary general sa Nagkahiusang Driver sa Sugbu (NADSU) nga si Ruben Rama nipadayag nang daan nga di sila mopaus-os sa pletihan kung di moabot sa P30 ang matag litro sa krudo. – BANAT NEWS