Anak sa polis ang nipatay

Anak sa usa ka police ang gitumbok nga nipusil patay sa usa ka tattoo artist alas 4:30 sa hapon niadtong adlaw’ng Domingo diha sa Doña Maria Village II, King St., barangay Punta Princesa ning dakbayan.

Matud pa ni Sr. Inspector Mario Monilar hepe sa Cebu City Homicide Section atol sa press conference diha sa iyang buhatan buhatan kagahapon ang suspek mao ang giilang Elvin “Borgo” Abella nga anak og polis.

Ang suspek maoy gitumbok nga mipusil-patay kang Seymour Abad, 34, nga usa ka tattoo artist ug lumad nga taga dalan Junquera apan nag-abang na diha sa nahitaboan.

Sa imbestigasyon ni SPO1 Rogelio Nedamo kasamtangang nagpatik ang biktima sa iyang higalang giila sa pangalang Roger samtang nag-inom uban sa laing higala nga ginganlan og Kenneth diha daplin sa agianan diha nga kalit nga giduol sa suspek ug gipusil ang ulo niini makausa ka higayon.

Si Abad namatay diha-diha gilayon human makaangkon og samad pinusilan sa iyang walang bahin sa kilay nga milapos sa luyong bahin sa iyang ulo, ang mga higala niini daling mikaratel palayo sa dapit.

Usa ka kabhang sa .9 mm narekober sa kapulisan diha sa crime scene human yano lang kaayong naglakaw ang suspetsado nga nisibat palayo sa dapit.

Matud pa ni Monilar ngadto sa mga tigbalita nga gipadalhan na niyag mga tawo ang panimalay sa amahan niining polis kagahapon aron dakpon ang anak niini nga positibong giila sa mga saksi.

Apan wala diha ang suspek nga gipangita sa iyang balay gawas sa kapuyo niini, wala usab makakuha og pamahayag ang mga imbestigador diha sa mga silingan niini.

Nagduda ang kapolisan nga personal ang motibo sa pagpatay hinungdan nga gusto usab nila karong sutaon ang background sa suspetsado ingon man dugang background sa biktima.

Gikunpirmar usab sa kapolisan nga nadakpan na kaniadto ug napasakaan og kasong frustrated murder niadtong 2006 ang gipatay.

Samtang usa sa ilang problema sa pagkakaron sa imbestigasyon sa maong kaso kay wala na mopakita ang testigos ug sirado na ang panimalay niini atol sa ilang pagbisita kagahapong adlawa.