Liki sa Catmon miigo sa Transco

Niabot na og dul-an 10 hektaryas ang kinatibuk-ang bukid nga naapektahan sa landslide tungod sa padayong pagpangliki sa yuta sa kabukiran sa sitio Guintigi-an, barangay Cabungaan lungsod sa Catmon sa milabay’ng semana.

Nasayran gikan sa Municipal Planning and Development Coordinator sa Catmon, Nelson Ares nga nagpadayon ang pag-irog sa mga nangliking yuta sa barangay Panalipan ngadto sa sikbit nga barangay.

Gipadayag ni Ares ang ilang kabalaka nga posibling ma-apil og katumba ang mga Transmission towers sa Transco sa barangay Panalipan tungod kay niabot na sa tiilan sa mga haligi niini ang pagpangliki sa yuta.

Ang gihimutangan sa Transco towers duna ray usa ka kilometro ang gilay-on gikan sa nahitaboan sa landslide.

Niabot na usab ngadto sa 31 ka panimalay ang nangaguba ug gibiyaan sa mga nagpuyo, dihang upat ka ektarya palang ang nidahili sa milabay’ng semana, 21 ka panimalay ra ang nangaguba.

Hangtud karun wala pa makagawas og inbentaryo ang municipal agriculture office kun pila ang kinatibuk-ang danyos sa mga pananom ug ubang kabtangan nga naigo sa landslide.

Matod ni Ares pagkakarun giasikaso karun ni Mayor Estrella Aribal ang rekomendasyon sa DSWD nga pahatagan og tagsa ka libo ka pesos nga hinabang pinansyal ang mga apektadong pamilya aron makapatukod og balik sa ilang naguba nga mga balay sa luwas nga lugar.

Pagkakarun ang mga apektadong pamilya anaa magpuyo sa sikbit nga mga panimalay sa ilang mga paryente human nipagawas og report ang taga Mines and Geo Sciences Bureau nga dili pa luwas puy-an ang maong lugar tungod sa padayung pag-irog- irog sa yuta sa maong lugar.

“Nag-ingon man ang mga nagpuyo didto nga naay magdahonog magkurog kuno ang yuta, mao nang panahon sa adlaw ra sila mobisita sa ilang balay ug dili sila mohigda sa gabii,” dugang asoy ni Ares.

Nasayran nga niadtong miaging semana nag-apod apod na og tagsa ka kilong bugas humay, mga canned goods ug noodles ang munisipyo ngadto sa mga apektadong pamilya.