Mikabat sa P70 mil ang kantidad sa kable sa Philippine Long Distance Telephone (PLDT) ang gikawat sa wala mailhing kawatan niadtong Miyerkules sa kaadlawon diha sa duha ka lugar sa dakbayan sa Talisay.
Ang maong hitabo ang daling gitaho ni Edmund Tabelon, 40-anyos, drayber sa nahisgutang kompaniya kinsa nakadiskubre nga ang kable diha sa barangay Pook nga mobalor og P50 mil nahanaw.
Ang maong kable usa ka FSF aerial cable 400 pairs x 24 gauge x 35 meters ang nadala sa wala mailhing kawatan.
Sunod nga insidente nahitabo sa mao gihapong adlaw diha sa barangay Linao diin nagkantidad og P20 mil nga FSF aerial cable 150 pairs x 24 gauge x 35 meters gihapon ang nadala usab sa wala mailhing kawatan.
Base sa imbestigasyon sa mga polis nga ang nahisgutang wire ang gikutay sa poste sa PLDT apan gisaka kini sa mga kawatan ug gipamutol.
Kahinumduman nga sa milabay'ng tuig misiaw ang kinawatay og kable sa telepono, cable ug kuryente kinsa ang mga kawatan ang aresgado kaayong mosaka sa mga poste ug moputol sa kable.
Gawas sa kinawatay sa mga kable ang kapolisan sa siyudad naproblema usab niadto sa kinawatay sa metro sa tubig ug sa Visayan Electric Company (VECO).
Ang kinawatay sa metro sa tubig ug kuryente ang nahilom na karon human ang mga polis ang nakasikop og mga suspetsado niini.