Kolektor gipadakop sa agalon

Gipadakop sa kaugalingon niining agalon ang usa ka collector nga nisirit sa linibo ka pesos niining koleksyon gikan sa ilang mga kostumer.

Ang gidakop didto sa iyang pinuy-anan sa Poblacion siyudad sa Bogo mao si Lemuel Guspang Tapia, 36, drayber/collector sa Livestock Feeds business nga nagbase sa Labangon dinhi sa dakbayan sa Sugbo.

Ang tag-iya nga si Gerald Glenn Reynes Magno, 33,    maoy nipadakop sa suspek human gisibat niini ang P60,246 nga koleksyon gikan sa ilang mga kustomer   sa lungsod sa Argao.

Matud ni SPO4 Robert Fernandez sa Bogo City Police dihang nahinabi sa Banat News subay sa gibasehan niining blotter apil sa nasakiyo gikan sa suspek ang duha ka cellphone nga gi-service niya sa trabaho  ingon man envelop nga gisudlan sa kuwarta, record book sa mga kustomer ug bag.

Ang kapulisan dinhi sa dakbayan sa Sugbu pinangulohan ni SPO4 Oscar Teves maoy nakig-alayon sa kapulisan sa siyudad sa Bogo pagpangita sa suspek niadtong Huwebes sa alas 11:00 sa gabii human modangop sa ilang buhatan ang amo niini.

Nasayran nga ang gisakiyo nga kuwarta sa suspek koleksiyon niya kini sa tibuok adlaw niadtong Miyerkules gikan sa ilang mga kustomer didto sa lungsod sa Argao nga utangan og feeds apan gikan niadto wala na mo-report og balik sa opisina ang suspek ug nideretso kini og pauli sa giabangan nga balay diha sa siyudad sa Bogo.