Tinun-an sa isyu sa 'sex scandal' balik klase

Gipabalik na pagtungha sa ilang klase kagahapong adlawa ang pito ka mga tinun-an sa Argao National High School sa lungsod sa Argao nga gilambigit sa ‘sex scandal’ niadtong Lunes sa hapon.

Gibutyag ni Darlina Ephan, computer teacher sa Argao National high School dihang nahinabi sa Banat News kagahapon sa udto gipabalik na sa pagtungha ang maong mga tinun-an tungod kay nasuta sa gihimo nilang imbistigasyon nga walay ‘sex scandal’ nga nahitabo.

Sa imbestigasyon ni Dr. Virgilio Suan, ang legal nga officer sa Department of Education (DepEd) sa probinsya sa Sugbo ug ni Dr. Serena Uy.

Samtang gibutyag ni Marivic Garces ang hepe sa Provincial Services Welfare Office sa Kapitolyo nga usa sila sa ni-insister nga patunghaon og balik ang maong mga tinun-an atol sa pagpahigayun sa imbistigasyon niadtong Miyerkules.

Si Garces nagkanayon nga base sa probisyon sa Childrens Code katungod sa kabataan ang edukasyon  ug dili usab mahimong sila ibalhin sa laing tunghaan.

Sa pito ka mga tinun-an nga nalambigit sa maong napublikar nga eskandalo dunay 1st year, 3rd year ug tulo ang 4th year.

Matod ni Garces bugtong nahimong kalapasan sa maong mga tinun-an mao lang ang pag-inom ug pag-cutting classes tungod kay wala gyuy lig-ong mga ebidensiya nga magpamatuod nga dunay nahitabong pakighilawas.