Polis angol nakaligis og iro

Nahiagom sa grabeng kadaot sa nagkada-iyang bahin sa lawas  ang  usa ka polis human kini  makaligis og iro samtang nagmaniho sa iyang motorsiklo  niadtong Miyerkulis sa gabii didto sa High-way ,sa barangay Ibo, dakbayan sa Toledo.

Ang nalandig sa South General Hospital sa dakbayan sa Naga  mao  si PO3 Elbert Dolino, taga Brgy. Cabitoonan og nadestino sa Toledo City.

Sumala sa spot report nga midangat sa buhatan sa Cebu Provincial Police Office, nasayran nga  si P03 Dolino gikan pa sa iyang panimalay paingong motrabaho niadtong higayona.

Ang report nagkanayon  nga samtang  nagmaniho sa iyang motorsiklo si Dolino, usa ka libud-suroy nga iro ang kalit milabang sa karsada ug nadasmagan sa iyang sakyanan.

Apan gumikan kay wala mopilit ang iyang preno, gidaro kini sa iyang motorsiklo hangtod ngadto sa kimba ug maayo nalang kay nasangit siya sa lubi.

Si Dolino nakaangkon og daghang mga pangos sa nawong ug sa uban pang bahin sa iyang kalawasan lakip na ang iyang bukton. Hinuon anaa na siya sa luwas nga kahimtang.