Gitabangan og kombinser si Mayor Tomas Osmeña sa halos tanang mga barangay kapitan sa habagatang distrito sa siyudad sa Sugbu nga makig-uli na kang Kongresista Tony Cuenco.
Kini atol sa gipatawag nga tigom ni ABC president Eugenio “Jingjing” Faelnar niadtong miaging adlaw sa tanang mga barangay kapitan sa south district.
Si Basak San Nicolas Barangay Captain George Rama giingong maoy niabli ug niuna paghangyo sa mayor nga makig-uli na sa maayong kabubut-on sa kongresista.
Apan matod ni Rama nga nibalibad ug dili pa gusto si Osmeña nga makig-alayon og balik kang Cuenco labot sa politika.
Niingon ang kapitan nga wala na lang usab sila mamugos sa mayor tungod kay kini dili mahimo nga ilang pugson pagdawat sa kongresista.
Una nang gipadayag sa mayor nga dili na mahimo nga siya makig-uban pa kang Cuenco tungod kay kini giingong dili na masaligan.
Wala pa mapapas sa huna-huna ni Osmeña ang kalit nga paglarga ni Cuenco ngadto sa Amerika dihang nagsingabot ang barangay elections sa miaging tuig.
Nasayran nga ang mayor maoy gidangpan sa mga kapitan nga ilang kaalyado sa habagatang distrito tungod sa kalit nga pagbiyahe sa kongresista.
Apan gipadayag ni Cuenco nga mahinungdanon ang iyang pagbiyahe sa Estados Unidos tungod sa pagpatambal sa iyang sakit nga “Vertigo”.
Gani nidugang ang kongresista nga siya mipasabot sa iyang biyahe ngadto sa mga kapitan sa south district atol sa iyang pagbalik dinhi sa Sugbu.
Niingon si Cuenco nga nangayo na usab siya og pasaylo sa mayor sa iyang sayop nga nahimo, tungod sa iyang kapakyas pagpananghid niini.
Apan daw dili madawat ni Osmeña ang tumang pagpasabot sa kongresista bisan kung kini gipangayo na ni Cuenco kaniya.
Taliwa niini, malaumon hinoon gihapon ang mga barangay kapitan sa habagatang distrito nga ilang kaalyado, nga magka-uli ra ang duha sa maayo nilang kabubut-on.