4 napusilan sa tisa

Upat ka mga tawo ang nangaangol human mangapusili sa managlahing dapit sitio Chicos, San Jose Extension ug sa dalan F. Llamas sa barangay Tisa kagahapon sa kaadlawon, apan duha kanila maoy gitumbok nga suspek sa laing duha ka mga nangaangol.

Ang nangalandig sa tambalanan mao sila si Vladimer Galan, 19, tinun-an sa kolehiyo ug residente sa sitio San Miguel sa samang barangay ug Joepet Visto, 18, tinun-an gihapon sa kolehiyo ug residente sa nahitaboan.

Samtang ang gitumbok nakapusil kanila ug nangapusilan usab mao sila si Warren Padasas, 18, residente sa Holy Name sa barangay Mabolo ug silingan niining si Ramil Binolirao, 21.

Sa imbestigasyon sa grupo ni SPO4 Alex Dacua sa Homicide Section sila si Visto ug Galan kasamtangang nagpundo diha sa daplin sa dalan uban sa mga kaparyentehan samtang nagpaabot sa patay'ng lawas sa ilang namatay nga apuhan nga gikan giatiman sa punerarya aron hayaon diha sa ilang balay.

Apan sa kalit lang duha ka lalaking nagsakay og usa ka motorsiklo ang kalit nga mihunong sa ilang atubangan ug ang backrider mipusil kanila makadaghang higayon.

Ang mga biktima ug kaubanan nagkatibulaag og panagan samtang daling mipasutoy ang mga suspek palayo padulong sa San Jose Extension samtang gidali og dala sa Cebu City Medical Center ang duha.

Si Galan naigo diha sa ulo samtang si Visto naigo diha sa tuong bukton.

Ang kapolisan sa Punta Prinsesa mipahigayon og hot pursuit operation samtang ang Scene of the Crime Operation misusi na sa crime scene ug walay nakuhang basiyo sa bala diha sa crime scene.

Apan tulo ka oras ang nakalabay samtang padayon pa ang imbestigasyon lain na usab pagpamusil ang nahitabo dili layo sa gihitaboan ning higayuna diha  kini nahitabo sa dalan F. Llamas sa samang barangay.

Sila si Padasas ug Binolirao maoy nabiktima. Sumala pa sa Homicide Section naigo si Padasas diha sa walang abaga ug sa walang bahin usab sa tiyan naigo si Binolirao.

Wala pa matino sa kapolisan kung si kinsa ang nipusil sa duha.

Daling gidala sa CCMC si Padasas ug Binolirao diin usab gidala sila si Visto ug Galan apan sa pagkakita ni Visto sa duha iya dayon kining giila nga mao ang mga lalaking namusil kanila, duna pay laing duha ka batan-ong testigo nga miila usab kanila lakip na sa motorsiklong ilang gisakyan.

Tungod niini giaresto sa mga polis ang duha ug gisakmit ang ilang motorsiklo nga Rusi nga metallic green ang kolor ug may plakang IK-4594 nga nasutang nakarehistro sa pangalan sa usa ka Francisco Binolirao.

Diha sa crime scene sa F. Llamas nakakuha og tulo ka basiyo sa kalibre .45 nga bala ang SOCO lakip na ang duha ka deformed slug ug ang motorsiklo sa duha.

Si city police director Patrocinio Comendador mitug-an sa mga tigbalita nga di mabasol sa tanang oras ang kapolisan sanglit padayon ang ilang gihimong mga checkpoints ug police visibility kontra krimen apan gumikan sa kadako sa lugar dili tanan  mabantayan sa kapin 1,000 ka polis sa dakbayan.

Kini maoy reaksyon sa opisyal human dunay report nga may kabanay sa duha ka naunang biktima ang nireklamong walay mga polis ug checkpoint nga gihimo ang Punta Prinsesa police station.

“Even if we deploy all the police in any given day we can’t cover every inch of  the city. We must be practical,” asoy pang Comendador.

Misabot hinuon ang opisyal sa sentimiyento sa mga nabiktima apan kini mipadayag nga dunay mga checkpoint nga gihimo ang iyang mga sakop apan natungnan lang gyud nga wala kini himoa  diha sa nahitaboan.

Subling gimandoan ni Comendador ang hepe sa Punta Prinsesa police station sa paghimo pa og dugang mga checkpoints sa iyang hurisdiksyon kontra krimen.