18 ka balay naugdaw sa sunog

Mikabat sa 18 ka balay ang gilamoy sa sunog kagahapon sayo sa buntag diha sa sitio Alaska- Proper, barangay Mambaling nga miresulta usab sa pagkaangol sa usa ka babaye.

Ang sunog naalarma alas 6:22 sa buntag ug daling giisa sa 2nd alarm samtang nagpadulong pa ang kabomberohan gumikan kahimtang sa lugar.

Apan sa pag-abot diha sa fire scene, giisa ngadto sa third alarm ang sunog tungod sa kapiot sa lugar ug kasagaran mga balay ginama sa light materials.

Si SFO2 Felix Romero ang duty fire scene investigator sa pakighinabi sa Banat News nagkanayon nga ang sunog base sa gitug-an sa mga residente nagsugod diha sa balay nga gipanag-iya ni Adolfo Edaño.

Nasayran nga ang maong balay giokupar na sa magtiayong Anecita ug Dante Managaytay apan wala pa matino sa kabomberohan kung unsay sinugdanan sa maong sunog.

Usa sa namatikdan diha sa maong dapit nga gawas sa kapiot sa dapit ug maglisod ang kabomberohan sa pagsulod mao ang kakulang sa kontrol sa mga tawo diha sa maong dapit.

Diha palang sa dalan C. Padilla atbang sa Pronton Jai-Alai napulo ka mga fire trucks ug fire engines gikan sa Bureau of Fire Protection, Emergency Rescue Unit Foundation ug Fil-Chinese Fire Brigade ug Sto. Niño Fire Volunteers ang naglinya.

Gibutang ni City Fire Marshal Ismael Codilla ang danyos gibana-banang P320,000 apan dako ang pagtuo sa kabomberohan nga posibleng mas mosaka pa kini inig katapos na sa ilang pagtigum og impormasyon.

Usa ka balay usab ang partially damage ra nga gipanag-iya sa usa ka Cleofe Dinagit samtang giila usab ang naangol mao ang usa ka Girlie dela Peña kinsa nakaangkon og paso dihang nagsugod ang kalayo sa balay sa silingan niining sila si Managaytay.

Si Lita Catampuhan sa pakighinabi sa Banat News kansang balay naugdaw usab ug tupad sa balay sa mga Managaytay nakadungog siya og ‘piti-piti’ sa kuryente ug nisunod dayon ang pagsiga sa kalayo diha sa balay.

Dunay report nga illegally wire-tapped ang linya sa kuryente sa panimalay nga sinugdanan sa sunog.

Nasayran nga wala diha ang magtiayong Managaytay tungod kay tua sila sa tambalanan kay nanganak ang ilang umagad.

Nasuta usab nga niadtong milabay’ng semana susamang insidente gihapon ang namatikdan sa maong balay apan wala kini moresulta sa sunog.

Karong Lunes ipatawag sa BFP ang magtiayong Managaytay ug ang tagbalay nga si Edaño aron kakuhaan og pamahayag lakip na usab ang posibleng mga saksi.