Reporter biktima sa lungkab

Balay sa reporter ning pamantalaan ug sa The Freeman gilungkab kagahapon sa kaadlawon diha sa barangay Parian.

Nidangop sa Theft and Robbery Section ang reporter nga si Edwin Ian Melecio human madiskubrehing gikawat ang tulo ka alkansya sa iyang mga anak ug relo de pulso nga 21 Jewels Seiko 5 nga transparent ang luyo ug nagkantidad og kapin P4,000.

Samtang gibana-banang mokabat sa P3,000 ang mga sensilyong gikan sa tulo ka coin banks. Matud pa sa biktima nga gipilian lang sa mga kawatan ang mga sensilyo ug ang tag P10 ug P5 ang gidala samtang gibilin diha sa luyong bahin sa balay ang tagpisuhon ug P.25.

Matud pa niini nga nahinanok sila og katulog nianang tungora og wala makamatikod sa pagsulod sa kawatan diha sa luyong bahin sa kural ug misulod agi sa kusina.

Ang maong mga butang diha gipatong ibabaw sa refrigerator sa sala. Ang mga sakop sa Scene of the Crime Operation nakakuha na sa mga fingerprints nga nabilin diha sa crime scene ug gikatakdang gamiton sa pag-ila sa kawatan.